ગાંધીધામથી ૩૦ જૂન સુધીમાં હમસફર એક્સપ્રેસ શરૃ થઈ જશે, લડત મોકૂફ

ગાંધીધામ-તીરૃનવેલ્લી વચ્ચે જાહેરા થયેલી હમસફર એક્સપ્રેસ પીએમઓની મંજુરીના કારણે વિલંબમાં મુકાઈ હોવાની વાત સામે આવી રહી છે. તેવામાં સરકારી તંત્રો અને રેલવે વિભાગ કંઈ ફોડ પાડતું ન હોવાથી કચ્છ મલયાલમ વેલ્ફેર એસોસીએશન દ્વારા રેલીનું આયોજન કરવામાં આવ્યું હતું. જોકે આ અંગે મળેલી બેઠકમાં ગાંધીધામ ચેમ્બરના પ્રમુખ અને મલયાલમ સામાજના પ્રમુખને સાંસદે તા.૩૦/૬ સુધીમાં આ ટ્રેન ચાલુ થઈ જવાની ખાતરી આપતા હાલ પુરતી રેલી મોકૂફ રાખવામાં આવી છે. સરકાર દાવા પ્રમાણે ટ્રેન ચાલુ નહી કરે, તો ફરી આંદોલનની ચિમકી ઉચ્ચારવામાં આવી છે.

આ અંગે મળતી વિગતો મુજબ ગાંધીધામ-તીરૃનવેલ્લી વચ્ચે બે વર્ષ પહેલા સ્પેશિયલ ટ્રેન શરૃ કરવામાં આવી હતી. આ ટ્રેનને પ્રવાસીઓ મળી રહેતા હોવાથી રેલવે દ્વારા આ સ્પેશિયલ ટ્રેન અંદાજે એકાદ વર્ષ ચલાવી હતી. આ ટ્રેનના કારણે કચ્છમાં વસતા મહારાષ્ટ્ર, ગોવા, કર્ણાટક, કેરળ અને તામીલનાડુના લોકોને રાહત થઈ હતી. ત્યારબાદ ગત ઓક્ટોબરમાં આ ટ્રેનને હમસફર બનાવવાની જાહેરાત થતા આ લોકોમાં આનંદની લાગણી ફેલાઈ હતી. હમસફર ટ્રેન ચાલુ કરવાની જાહેરાત થતા ચાલુ સ્પેશિયલ ટ્રેન રેલવે વિભાગે બંધ કરી દીધી હતી. પરંતુ ગુજરાત વિધાનસભાની ચૂંટણીના પગલે આ ટ્રેન ઓક્ટોબરમાં ચાલુ કરી શકાઈ ન હતી. ત્યાર બાદ આ ટ્રેન ભેદી સંજોગોમાં ચાલુ કરવામાં આવતી ન હતી. ખુદ રેલવે વિભાગના એક ઉચ્ચ અધિકારીએ પીએમઓની મંજુરીના કારણે ટ્રેન શરૃ થવામાં વિલંબ થઈ રહ્યો છે તેવું જણાવ્યું હતું. જેતે વખતે એપ્રીલમાં ટ્રેન શરૃ થઈ જવાની ખાતરી આપવામાં આવી હતી. પરંતુ તેમ છતાં આ ટ્રેન શરૃ નહી થતા મલયાલમ સમાજ દ્વારા ગાંધીધામ રેલવે સ્ટેશન સુધી રેલીનું આયોજનની તૈયારી કરવા ગુરૃવારે ગાંધીધામ ચેમ્બર ઓફ કોમર્સ હોલ ખાતે એક બેઠક બોલાવામાં આવી હતી. જેમા ચેમ્બરના હોદેદારો, કચ્છ તામીલ વેલ્ફેર એસોસીએશન, કચ્છ કર્ણાટક સંઘ, માનવતા ગુ્રપ, શ્રી નારાયણ ટ્રસ્ટ સહિતની સંસ્થાઓ જોડાઈ હતી. જેમાં આગામી રેલીની ચર્ચા કરાઈ હતી. પરંતુ ચાલુ બેઠકમાં જ ચેમ્બરના પ્રમુખ બાબુભાઈ હુંબલ તથા કચ્છ મલયાલમ વેલ્ફેર એસોસીએશનના પ્રમુખ વી.પી.કે.ઉન્ની મેનને કચ્છના સાંસદે તા.૩૦/૬ સુધીમાં ટ્રેન ચાલુ થઈ જવાની ખાતરી આપી હતી. અને જેથી રેલી મોકુફ રાખવા અપીલ કરી હતી. જેના પગલે તા.૩૦/૬ સુધીમાં રેલી મુલતવી રાખવાનું બેઠકમાં નક્કી કરવામાં આવ્યું હતું. તા.૩૦/૬ સુધીમાં ટ્રેન ચાલુ નહી કરાય તો ફરી રેલી યોજવા સહિતના પગલા અંગે બેઠક બોલાવામાં આવશે.

- મા આશાપુરા ન્યુઝ,

ભુજ કચ્છ , ભારત.

94287 48643 વોટ્સએપ,

97252 06123 - 37,

72260 06124 - 33,

Youtube : maa news live,

Android app : maa news.

Blog : maanewslive. blogspot. com

Facebook : maa news live page / group

Twitter : @jaymalsinhB

Email : jaymalsinhjadeja@gmail.com